Aprobado o expediente de expropiación dos terreos afectados pola segunda fase de ampliación dos equipamentos do CEIP Otero Pedrayo

Na sesión ordinaria da Xunta de Goberno Local celebrada hoxe foi aprobado con carácter inicial o expediente de expropiación dos terreos afectados pola segunda fase de ampliación dos equipamentos do CEIP Otero Pedrayo. O Concello investirá 81.067,22 euros na adquisición de 13.761 metros cadrados de superficie repartidos en vinte e unha parcelas e que están cualificados no Plan Xeral de Ordenación Municipal en tres clases diferentes: solo urbano, núcleo rural e solo urbanizable non delimitado. Os terreos actualmente non presentan un uso produtivo definido e están carentes de edificacións.

Continuando cos trámites administrativos, o acordo de hoxe da Xunta de Goberno Local será publicado no Diario Oficial de Galicia (DOG) e estará un mes en exposición pública antes de elevarse a definitiva a aprobación do proxecto de expropiación. Así mesmo, notificarase aos propietarios e abrirase o período de alegacións ao xustiprezo.

Dispoñer destes terreos permitirá ao Concello aumentar a superficie vinculada ao CEIP Otero Pedrayo para equipamentos deportivos ou educativos cara o norte, en continuidade cos existentes actualmente, e ampliar a rúa José Añón co propósito de mellorar o acceso cara o colexio desde a estrada AC-552. Así, resolveríase o tráfico na zona, aumentaríase a seguridade viaria ao dividir o tránsito rodado do peonil, incrementaríase o espazo para facilitar as manobras dos autobuses e habilitaríase unha zona de aparcamento para o transporte escolar.

Cabe lembrar que recentemente o Concello rematou a expropiación dos terreos da primeira fase de ampliación dos equipamentos educativos deste mesmo colexio. Investíranse preto de 44.000 euros na compra das parcelas afectadas polo proxecto –valorado noutros 245.000 euros- de ampliación da estrada entre Bos Aires a As Calzadas que dá acceso ao centro de ensino.

Fomento do emprego

A Xunta de Goberno tamén acordou solicitar a participación do Concello en dúas convocatorias de axudas para a contratación de persoal impulsadas pola Consellería de Emprego e Igualdade da Xunta de Galicia.

Unha delas é o programa de fomento do emprego no rural (Aprol Rural) a través do que se pretende incorporar tres peóns para formar unha cuadrilla para servizos de mantemento e valorización de zonas verdes. A outra solicitude vai dirixida á contratación de socorristas para o servizo de salvamento na praia de Caión durante a próxima temporada de verán.

Servizos sociais comunitarios

Tamén se acordou presentar á Consellería de Política Social o proxecto anual de servizos sociais municipais –valorado en 491.000 euros- para solicitar a achega económica para o seu cofinanciamento. Inclúense tanto os gastos derivados dos salarios dos empregados municipais vinculados a ese departamento como os do programa de axuda no fogar dirixido a persoas en situación de dependencia.