Concello
En marcha as obras do novo proxecto de mellora dos accesos ao parque empresarial da Laracha
18/10/2018
Xa está en marcha a execución do novo proxecto de mellora das infraestruturas viarias do parque empresarial da Laracha. Así o comprobaron o alcalde, José Manuel López Varela, e o concelleiro Jesús Souto nunha visita ás obras que está a executar a empresa Ponciano Nieto S.L.
A actuación consiste en completar os accesos principais ao polígono industrial, tantos os peonís como os rodados, na zona sur e na nordeste, aumentando deste xeito a seguridade viaria en ambos ámbitos.
Na entrada polo sur, o punto no que se centran actualmente os traballos, estase a construír unha senda peonil que comunicará a primeira glorieta da área industrial entrando desde a AC-552 ata a seguinte rotonda.
No acceso nordeste (estrada de Lendo, xunto á DP-1913) completaranse as beirarrúas pola marxe dereita e ampliarase a anchura da plataforma da calzada.
En ambos puntos de intervención será mellorado o pavimento para facilitar a circulación rodada dos vehículos.
Este proxecto está valorado en 120.000 euros e é cofinanciado entre o Concello da Laracha e a Consellería de Economía e Industria da Xunta de Galicia ao abeiro do programa de habilitación e mellora das infraestruturas dos parques empresariais públicos galegos.
