Elevada a definitiva a aprobación do proxecto de expropiación dos terreos nos que se sitúa o menhir de Erboedo

Na última sesión da Xunta de Goberno Local elevouse a definitiva a aprobación do proxecto de expropiación dos terreos nos que se sitúa o menhir de Erboedo –tamén coñecido como marco da Anta ou pedra do ghicho- unha vez superado o período de información pública ao que estivo sometido o documento durante un mes.

O Concello investirá 8.000 euros na adquisición dunha superficie de 4.651 metros cadrados -repartidos en tres parcelas catastrais e cualificadas no Plan Xeral de Ordenación Municipal (PXOM) como solo rústico de protección integral de patrimonio e solo rústico de protección forestal ou de montes- co propósito de preservar o valor histórico do que é un dos elementos máis importantes do patrimonio arqueolóxico municipal.

O menhir de Erboedo está datado na Idade de Bronce. Trátase dunha pedra de granito groso, con vetas de cuarzo e feldespato, que alcanza os dous metros de altura. Na súa base posúe catro pedras do mesmo material a modo de calzos de apoio. Unha vez completado o procedemento de expropiación, o Concello estará en disposición de levar a cabo as actuacións precisas para favorecer a súa conservación e acondicionar o terreo e os accesos.

Cabe lembrar que o goberno local impulsara o Plan Especial de Patrimonio Cultural -que supuxera unha modificación puntual do Plan Xeral de Ordenación Municipal (PXOM)- precisamente co obxectivo de ofrecerlle a máxima protección a este menhir e a outros seis elementos do catálogo de patrimonio municipal –Castro de Montes Claros, Castro da Pena, Croa de Santa Baia, as Torres de Cillobre e os dous Fornos dos Mouros de Soandres- e posibilitar a súa adquisición para conservalos e poñelos en valor.

O alcalde, José Manuel López Varela, e a concelleira de Cultura, Patricia Bello, visitaron o lugar no que se sitúa o menhir para coñecer o seu estado actual datas antes de que pase a ser de titularidade pública.

Programa de voluntariado xuvenil

Na Xunta de Goberno tamén se acordou presentar á Consellería de Política Social o proxecto dun novo programa de voluntariado xuvenil ao abeiro da convocatoria de subvencións para o desenvolvemento de iniciativas desas características (DOG núm. 61 do 31 de marzo de 2021). O propósito esencial é fortalecer a aprendizaxe dos voluntarios e reforzar os seus valores solidarios.

Do mesmo xeito que en anos anteriores, o Concello pretende ofrecer á mocidade participar como persoal de apoio aos técnicos especializados nas diferentes actividades municipais de tipo cultural, social, educativo, deportivo, xuvenil, medioambiental e de promoción do benestar das persoas maiores e da igualdade de oportunidades entre homes e mulleres que se levarán a cabo nos próximos meses. Os voluntarios recibirían dos profesionais municipais a orientación, formación e apoio necesarios e, ao rematar a participación, entregaríaselles un certificado oficial pola súa colaboración e recoñecendo o seu valor social.

Licencias urbanísticas

Salientar, por último, a concesión de tres licencias urbanísticas, das cales unha foi a de primeira ocupación dunha vivenda unifamiliar no lugar de O Cruceiro da parroquia de Lestón.