Comeza a executarse o proxecto de urbanización da prolongación da Avenida Manuel Fraga

Xa están en marcha as obras do proxecto de urbanización da Avenida Manuel Fraga ata a rúa Maruja Mallo, pola parte posterior do IES Agra de Leborís. O alcalde, José Manuel López Varela, e a concelleira Patricia Bello mantiveron unha reunión cos operarios no lugar das actuacións para interesarse polo inicio dos traballos que está a desenvolver a empresa Construcciones Ponciano Nieto S.L.

O proxecto está valorado en preto de 245.000 euros e forma parte do Plan especial de equipamentos educativos do Instituto. Inclúe a pavimentación da calzada, construción de beirarrúas, espazo de aparcamento, axardinamento, creación das redes de saneamento e abastecemento, canalización soterrada dos servizos de rede eléctrica, telecomunicacións e iluminación pública e tamén a sinalización horizontal e vertical, estando contemplado, entre outras medidas de seguridade viaria, un paso de peóns elevado.

Con esta intervención crearase unha circunvalación que conectará directamente a estrada A Laracha-A Silva (DP-2404) coa estrada A Laracha-Soandres (DP-1913) pola Avenida Doutor López Astray, mellorándose sensiblemente as comunicacións rodadas ao evitar que os vehículos deban acceder polo centro do casco urbano da Laracha.

A obra tamén permitirá habilitar un novo acceso cara o instituto –pola parte posterior do centro- para os autobuses de transporte escolar, reforzándose así a seguridade para os seus usuarios.

O Concello está a crear neste lugar do núcleo urbano da Laracha un punto de referencia para os veciños xa que, ademais da apertura e urbanización da nova vía, nesta zona crearanse unha segunda pista polideportiva descuberta –a outra, de recente construción, xa está operativa- e unha pista de skate.