O Concello traslada aos pavillóns dos colexios o tradicional festival de teatro infantil do Nadal

Todos os anos nos días previos as vacacións de Nadal nos centros de ensino o Concello da Laracha organiza un festival de teatro dirixido ao alumnado dos colexios e que se desenvolve en horario lectivo. Este ano tamén se está a levar a cabo pero dun xeito diferente, xa que os espectáculos trasládanse aos pavillóns –o lugar habitual era a Casa da Cultura da Laracha- para dispoñer dun maior espazo e garantir o cumprimento das medidas de distanciamento social (ademais do uso da máscara facial e do xel hidroalcohólico).

Así, todos os estudantes de primaria do termo municipal –e tamén os de infantil dos CEIPs Alfredo Brañas e Caión- gozarán ao longo desta semana da obra de Talía Teatro titulada Lambetadas.

A estrea foi hoxe no pavillón do CEIP Otero Pedrayo, asistindo o alumnado de 1º e 2º curso dese centro. Mañá haberá dúas funcións no mesmo lugar, sendo a primeira (10:00 h) para os de 3º e 4º e a segunda (12:00 h), para os de 5º e 6º.

O xoves, a mesma obra de teatro trasladarase ao pavillón do CEIP Alfredo Brañas para ter como público asistente na primeira función (10:00 h) a todo o alumnado do CEIP de Caión e, na segunda (12:00 h), aos estudantes do colexio de Paiosaco.

Ao remate de cada unha das funcións hai unha visita de Papá Noel para facer entrega a cada neno de dúas máscaras infantís de tela, lavables e reutilizables, co escudo do Concello da Laracha gravado. Estas máscaras tamén se entregarán ao alumnado de educación infantil do CEIP Otero Pedrayo que non asistiu á obra de teatro por decisión do seu profesorado, a todo o persoal dos tres colexios e ao alumnado e comunidade educativa do IES Agra de Leborís.