Concello
As bibliotecas municipais reabrirán ao público o luns 18 de maio
16/05/2020
As bibliotecas municipais da Laracha, Paiosaco e Caión reabrirán ao público este luns. Farano coas limitacións establecidas no protocolo de actuación fronte á Covid-19.
Soamente se ofrecerá o servizo de préstamo de libros, que unha vez devoltos estarán catorce días en corentena de acordo á normativa das autoridades sanitarias. Por este mesmo motivo os préstamos limitaranse a dous libros por persoa durante 21 días.
Os servizos que non estarán dispoñibles son os de lectura en sala e o emprego dos ordenadores.
O aforo limitarase a un único usuario por quenda no interior da instalación, a excepción dos menores de doce anos que deben acudir acompañados dunha persoa adulta. Os usuarios que acedan ás bibliotecas deberán facelo con máscara e empregar o xel hidroalcóholico que estará á súa disposición no interior das instalacións. En todos os casos, os libros serán solicitados polos usuarios e proporcionados polo persoal da biblioteca, tocándoos o menos posible.
Os horarios de apertura serán os seguintes de luns a venres:
- Biblioteca municipal da Laracha: de 12 a 14 h pola mañá e de 17 a 19 h pola tarde.
- Bibliotecas municipais de Paiosaco e Caión: De 17 a 20 h.
