Aprobados por unanimidade os dous puntos da orde do día do Pleno

No Pleno ordinario celebrado hoxe foron aprobados por unanimidade dos tres grupos da Corporación municipal os dous asuntos promovidos polo goberno local.

Un deles foi o destino dos fondos do programa provincial POS+2020. O Concello da Laracha percibirá un total de 683.169,14 euros divididos en tres achegas diferentes: 76.711,81 euros corresponden á execución de obras, 289.478,36 euros son a parte relativa ao préstamo provincial para o financiamento de proxecto de mellora das infraestruturas públicas municipais e, por último, 316.978,97 euros destinaranse a gasto corrente. Ademais, aprobáronse outros dos proxectos por un importe conxunto de 349.813,96 que corresponden ao plan complementario.

En concreto, os proxectos que se executarán con cargo á achega para a execución de obras e o préstamo provincial consisten na mellora da rede viaria municipal nos seguintes lugares:

• Parroquia de Cabovilaño: estrada O Chamusco-Arén e núcleos de Nogán, As Ribas, A Teixoeira e Cardois.
• Parroquia de Coiro: núcleos de O Pereiro e Longra.
• Parroquia de Lendo: accesos a Lista e Os Abelares.
• Parroquia de Soandres: accesos a O Toural, núcleo de A Bocixa e camiños municipais en O Campo de Medado.
• Parroquia de Montemaior: núcleos de A Ribeiriña, A Cerceira, Cumiáns e A Fieira.
• Parroquia de Vilaño: estrada en Vilaño Vello.
• Parroquia de Caión: mellora da estrada e da rede de saneamento en Xermaña.
• Parroquia de Erboedo: núcleos de O Vilar e Vilarmaior.
• Parroquia de Lestón: núcleo de A Porta Santa.

Ademais, o Plan complementario inclúe actuacións no núcleo urbano da Laracha (rúas Río Anllóns, Río Bradoso e Eusebio Bértoa), nas parroquias de Cabovilaño (núcleo de A Casanova, accesos a Oldán e estrada O Castro-A Lagarteira), Coiro (núcleos de A Ferraría, A Riba, A Ferrulleira, A Fontefría e Fornos) e Soandres (núcleo de Compañeir), e nas estradas Vista Alegre-Samiro (Vilaño), Requesende-A Ferrulleira (Golmar e Coiro) e O Ramallal-A Piña (Golmar e Vilaño).

O alcalde, José Manuel López Varela, explicou que hai unha “baixada importante, duns 316.000 euros” con respecto aos ingresos do ano pasado con cargo ao mesmo programa, pero adiantou que a previsión da Deputación da Coruña é equiparalos unha vez poidan incorporarse os remanentes.

O outro asunto aprobado por unanimidade foi a modificación puntual da relación de postos de traballo (RPT) promovida coa finalidade adecuar a nova estrutura dos servizos económicos do Concello á existencia de dous postos de habilitados nacionais nese departamento. Implica a amortización por duplicidade de funcións dun posto vacante na RPT (técnico de intervención) e a creación de dous novos postos: o de tesoureiro (funcionario de Administración Local con habilitación de carácter nacional) e o de auxiliar administrativo.

Este acordo será publicado no Boletín Oficial da Provincia (BOP) e estará en exposición pública por un período de vinte días.