ELECTRODOMÉSTICOS ERVE, PRIMEIRO PREMIO DO 20º CONCURSO DE ESCAPARATES DE NADAL
29/12/2015
O xurado da 20ª edición do concurso de escaparates de Nadal –composto por representantes municipais e Concha Iglesias, a presidenta da Asociación de Comercio, Servicios e Industria da Laracha (ACSIL)- que cada ano convoca o Concello da Laracha reuniuse na tarde do 28 de decembro para visitar e valorar os locais participantes no certame, situados todos eles nas vilas da Laracha e de Paiosaco.
Electrodomésticos Erve, establecemento situado na rúa Coruña da capital municipal, foi o gañador do primeiro premio, dotado con 250 euros. O xurado tivo en conta que todos os elementos que formaba a coidada e creativa composición do escaparate foron elaborados a man e resaltaban os produtos que están á venda no local, neste caso electrodomésticos.
Dáse a circunstancia de que Electrodomésticos Erve repite por segundo ano consecutivo no primeiro posto deste concurso.
O Concello da Laracha reparte en total 750 euros en premios no certame, cuxos obxectivos son o apoio ao comercio local e fomentar a realización de composicións orixinais e chamativas nos seus escaparates, potenciando ademais que os establecementos das rúas do municipio presenten nestas festas unha imaxe característica do Nadal que se combine coa decoración e a iluminación instalada polo propio Concello.
A relación completa de galardoados é a seguinte:
1º premio (250 euros): Electrodomésticos Erve (Rúa Coruña, 2. A Laracha).
2º premio (200 euros): Lazo de tul (Rúa Santa Lucía, 11. A Laracha).
3º premio (150 euros): Canela & Pimienta (Rúa José Manuel Ferreiro Penedo, 2. A Laracha).
4º premio (100 euros): Panadería Ramiro (Rúa Epifanio Campo Núñez, s/n. A Laracha).
5º premio (50 euros): Librería Pondal (Avenida Fisterra, 44. A Laracha).
