O Concello proxecta a mellora do auditorio do Centro Sociocultural de Paiosaco

O Centro Sociocultural de Paiosaco é o equipamento municipal de referencia tanto para Lestón como para outras parroquias próximas no que atinxe á actividade social e cultural. Ademais de acoller na súa planta baixa a biblioteca, aulas multiusos e o centro social para as persoas maiores, na planta soto alberga o auditorio no que se desenvolven ao longo de todo o ano os espectáculos da programación cultural municipal, así como outras actividades multitudinarias como os Seráns de Baile.

Esa planta soto do Centro Sociocultural de Paiosaco vai ser obxecto dunha intervención proxectada polo Concello e dirixida a mellorar as instalacións para facelas máis confortables tanto para o público asistente como para as compañías e os artistas que realizan nelas os espectáculos.

No auditorio van ser renovados os elementos de madeira que presentan deterioro debido ao uso durante os últimos anos e ao efecto da humidade da zona. Así, serán substituídos os revestimentos existentes por outros taboleiros laminados de carballo e mellorado o solo do escenario e da platea.

Tamén está prevista unha actuación no aseo dirixida a renovar os seus elementos e mellorar as canalizacións do mesmo.

Por último, contémplase a reparación da cuberta das escaleiras da saída de emerxencias para evitar as filtracións de augas pluviais.

Nos próximos días o Concello iniciará a fase de contratación deste proxecto, que presenta un orzamento próximo aos 22.000 euros, contándose para o seu cofinanciamento cunha achega de 7.500 euros da Consellería de Cultura, Lingua e Xuventude da Xunta de Galicia ao abeiro do programa de subvencións a entidades locais para o equipamento e mellora das instalacións utilizados para a realización de actividades culturais.