O Concello incrementará a dotación económica do programa "Eu merco na Laracha" para atender todas as solicitudes de bonos da veciñanza

Unha vez rematados os prazos establecidos no programa Eu merco na Laracha, a iniciativa que impulsa o Concello co propósito de dinamizar e reactivar o comercio local subvencionando as compras dos cidadáns, rexistráronse un total de 1.466 solicitudes de bonos por parte da cidadanía e hai 41 locais adheridos nos que poderán empregarse para descontar o importe das compras.

Debido á existencia de maior número de peticións de bonos que os dispoñibles inicialmente, o Concello incrementará a partida orzamentaria do programa, dotada nun primeiro momento con 40.000 euros (para 1.333 bonos de 30 euros), para atender todas as solicitudes. Durante os próximos días os técnicos municipais realizarán as comprobacións oportunas para verificar que as persoas solicitantes cumpren cos requisitos establecidos, que son estar empadroadas no termo municipal da Laracha e ser maiores de 18 anos de idade.

O 7 de xuño publicarase en www.eumerconalaracha.alaracha.gal a listaxe das persoas agraciadas, mesma páxina web na que tamén haberá información actualizada sobre os establecementos, comercios e servizos adheridos.

O seguinte paso será recoller, do 10 ao 20 de xuño no Edificio Administrativo da Laracha, a chequeira por valor de trinta euros que conterá tres bonos de dez euros. Cada un deles será independente e poderá empregarse ata o 30 de xuño para descontar por cada gasto de vinte euros nas compras e consumos nos establecementos ou servizos adheridos.