O PLENO ACORDA A INCORPORACIÓN DO CONCELLO DA LARACHA AO SISTEMA DA HISTORIA SOCIAL ÚNICA ELECTRÓNICA

Na sesión ordinaria do Pleno celebrada hoxe, os catro grupos políticos con representación na Corporación municipal aprobaron por unanimidade os dous puntos incluídos na orde do día a proposta do equipo de goberno local.

Por una parte acordouse a adhesión ao convenio promovido pola Xunta de Galicia e a Federación Galega de Municipios e Provincias (Fegamp) para a implantación da historia social única electrónica (HSUE). O propósito esencial é a modernización tecnolóxica dos servizos sociais para mellorar a eficiencia na xestión e, ao mesmo tempo, garantir a sustentabilidade da organización e incrementar a capacidade para dar cobertura á demanda existente. O plan baséase na creación dun sistema integrado de intercambio de información entre os servizos sociais, os sanitarios e as administracións locais e autonómica. A HSUE é considerada como o soporte máis axeitado para a intervención social porque facilita o manexo da accesibilidade á información de relevancia por parte de todos os profesionais técnicos implicados, o que posibilitará o xurdimento dun novo xeito de traballar máis áxil e eficiente. En todo caso, este sistema garante a confidencialidade e respecta plenamente os dereitos das persoas usuarias.

Así mesmo foi aprobada a modificación da ordenanza fiscal número 17, reguladora do imposto sobre construcións, instalacións e obras (ICIO). O texto actual contempla bonificacións na cota do 75% para actuacións que sexan declaradas de especial interese ou utilidade municipal por concorrer circunstancias sociais, histórico-artísticas ou de fomento do emprego. O cambio supón o incremento ata o 95% de dita bonificación para o caso de actuacións promovidas polas administracións para a implantación de servizos públicos ou de interese comunitario. A primeira das obras que se beneficiaría desta medida será a ampliación do centro médico e punto de atención continuada da Laracha que acometerá a Xunta de Galicia.

Ademais, deuse conta á Corporación das 255 resolucións de alcaldía ditaminadas entre o 23 de novembro e o 23 de xaneiro, así como do informe relativo ao período legal de pago e ao período medio de pago correspondente ao cuarto trimestre de 2016. Entre os meses de outubro e decembro aboáronse preto de dous millóns de euros en facturas a provedores, sendo máis de seiscentas as operacións realizadas nunha media de 26,49 días e, por tanto, “cumprindo estritamente a normativa, aínda que é o trimestre máis complicado do ano porque supón o peche do exercicio”, como afirmou o alcalde, José Manuel López Varela.

Salientar, tamén, a aprobación por unanimidade dunha moción na que se apoia a proposta do Parlamento Galego de transferir a titularidade da AP-9 á Comunidade Autónoma de Galicia.

Por último, o alcalde explicou detalladamente toda a tramitación que o Concello da Laracha ten realizado para a creación dun campo de fútbol en Caión de titularidade municipal e, polo tanto, pública. López Varela afirmou que “este grupo de goberno ten vontade de facelo e vai apostar porque Caión teña un campo de fútbol”.