Concello
O Concello oferta visitas guiadas pola vila de Caión
18/07/2023
O Concello, a través da oficina municipal de información turística que está operativa en Caión desde o inicio do verán, levará a cabo un programa de visitas guiadas polos puntos máis destacados da vila costeira co obxectivo de coñecer o seu presente e tamén o pasado.
O percorrido levará aos participantes polo exterior do Pazo de Graxal, o Rueiro das Figueiras, o barrio de San Roque, o porto, a igrexa da Nosa Señora do Socorro, a reitoral e tramos do paseo marítimo e Sendeiro de Saldoiro. O remate será no museo do Arquivo da Pesca, situado no baixo da Confraría de Pescadores.
Ao estar todos os puntos a visitar moi próximos entre si, a iniciativa vai dirixida a todos os públicos, mesmo ás persoas residentes en Caión.
Para poder participar non se require inscrición previa. O punto de encontro desde o que se iniciará o percorrido é a Praza Eduardo Vila Fano os sábados 22 e 29 de xullo ás 12:00 h.
