Concello
O programa ‘Rueiros da Vila’ converterá Caión nun festival musical e cultural entre o 20 e o 28 de agosto
12/08/2022
A segunda edición dos Rueiros da Vila converterá Caión entre o 20 e o 28 de agosto nun festival musical e cultural con concertos e actividades lúdicas dirixidas a todos os públicos.
O evento foi presentado hoxe por unha ampla representación do goberno local encabezada polo alcalde, José Manuel López Varela, xunto a Mahoney, o responsable da entidade que xestiona o programa.
O rexedor municipal referiuse aos Rueiros da Vila como unha iniciativa “ambiciosa, ampla e gratuíta para o público asistente que financia integramente o Concello”. Explicou que nesta ocasión se celebrará en agosto, “o principal mes das vacacións”, co propósito de “remarcar o carácter de Caión como punto de referencia turística”. Ademais, destacou que ao mesmo tempo que se propoñen actividades para todos os públicos, “tamén se dá a oportunidade de actuar a grupos locais”.
Pola súa parte Mahoney puxo en valor a oferta “plural, nutrida e de carácter itinerante” que permitirá que poidan desfrutar dos eventos “desde os nenos ata os avós”. Considera que “o 50 % da programación é o propio enclave e os catro escenarios únicos que teremos”.
A música será a gran protagonista dos Rueiros da vila e encherá todos os recunchos de Caión durante esas xornadas ao estar habilitados catro escenarios diferentes para aproveitar todo o potencial que ofrece a localidade:
- Escenario Salseiras: zona verde xunto ao acceso principal á praia.
- Escenario Patio: finca situada entre a igrexa parroquial e o paseo marítimo.
- Escenario Rueiro das Figueiras: praza Virxe dos Milagres.
- Escenario Cárcere Vello: paseo marítimo.
O sábado 20 a dobre proposta comezará ás 18:30 h con 2B1_Selektah, grupo que amosa gran variedade fluíndo entre os beats do house e a música máis urbana, ademais de mesturar a música electrónica en todas as súas vertentes. Desde as 21:30 será a quenda para Pan Sen Fron, singulares pandeireteiras cuxa especialidade é tocar pola e en cuxo repertorio atoparemos pezas reinterpretadas cun estilo propio e característico.
O domingo 21 repetiranse os mesmos horarios. Pola tarde, co DJ Avocado. Á noite, con Fransy, Davide e Cibrián, un novo trío que trae unha proposta de música e letras tradicionais con aires novos e contemporáneos.
O luns 22 o protagonismo será para o supercombo musical Macheta Supah Sound (20:30 h), cunha mestura de estilos jazz, funk, blues e rock con ritmos da África occidental.
Para o martes 23 (20:30 h) está programada a actuación de Xackal, banda na que conflúen a música electrónica coa vitalidade das percusións.
O mércores 24 (20:30 h) continuarán os concertos coa música do banda larachesa Ambigüo que en breve presentará o seu novo LP.
O xoves 25 (20:30 h) será a quenda de Mad Martin Trío, a mellor banda galega de rock clásico.
O venres 26 a oferta volverá ser dobre, primeiro con Leuter (18:30 h), que presentará o seu novo directo, e Apart (21:30 h), banda de rock influenciada polos sons dos anos 70, pero cunha visión actualizada.
O sábado 27 concluirán os concertos coa música electrónica de Boneco (18:30 h) e a unión de culturas como ferramenta para promover a solidariedade e empatía entre os pobos do mundo a través do espectáculo visual e sonoro de Perfusión (21:30 h).
En cada xornada na que hai presenza de DJs farase un segundo pase unha vez rematados os concertos, polo que a música continuará despois das 23:30 h.
O domingo 28 o protagonismo será para os máis cativos cos Rueiros Pequeniños. Ás 13:00 horas teremos a actuación de Peter Punk e pola tarde, desde as 19:00 h, o contacontos musical As aventuras da castaña Garrida. Ambos eventos serán no Escenario Salseiras.
Como actividade complementaria, o mércores 24 desde as 12:30 horas coa colaboración da Confraría de Pescadores realizaranse os Roteiros da Vila, un percorrido polos lugares máis importantes da historia e tradicións de Caión guiado polo historiador local Marcos Amado que rematará cunha visita ao museo do Arquivo da Pesca.
O programa Rueiros da Vila ten o seu propio perfil nas redes sociais Facebook, Instagram e Youtube nos que se ofrecerá información puntual sobre todos os eventos que se desenvolverán nesas datas en Caión.
Descargas:
