Concello
A praia de Caión contará con sete socorristas e un coordinador xeral durante o próximo verán
02/06/2022
Na sesión ordinaria da Xunta de Goberno Local celebrada hoxe acordouse adxudicar a Top Rescue S.L. o contrato dos servizos de salvamento, socorrismo, vixilancia e primeiros auxilios que estará operativo na praia de Caión durante o verán, todos os días desde o 15 de xuño e ata o 15 de setembro en horario de 12:00 a 20:00 horas.
Nos próximos tres meses serán un total de sete socorristas máis o coordinador xeral o persoal que se encargará a diario desas funcións para aumentar a seguridade dos bañistas, informar sobre calquera cuestión que afecte á praia e controlar o uso axeitado do areal de acordo ás normativas vixentes e aos condicionantes establecidos pola Bandeira Azul.
Por primeira vez neste ano o servizo de salvamento incorporará unha moto acuática apta para realizar traballos de salvamento, polo que en todo momento estará presente canda menos un socorrista que posúa o título de patrón e que teña experiencia no manexo dese tipo de embarcacións.
O Concello inviste 68.000 euros neste contrato, que é prorrogable para a temporada de verán do ano 2023.
Licencias urbanísticas
Na Xunta de Goberno Local tamén foron concedidas tres licencias urbanísticas, das cales dúas son para a construción de sendas vivendas unifamiliares nos núcleos de A Calvela (parroquia de Golmar) e A Fonte da Canle (Vilaño).
