Torás, A Laracha

Atópase no lugar de Torás, na parroquia do mesmo nome.

Rodeada por un pequeno muro, trátase dunha igrexa de planta de salón na que se distingue unha soa nave e ábsida rectangular.

A fachada principal, construída en 1876, acolle todo o esforzo decorativo do seu creador, o mestre Manuel Rosende. Ten un marcado eixo central sinalado pola porta -alintelada e de decoración moldurada-, unha fornela e unha xanela rectangular. Remarcando o eixo central, ten unha espadana de dous ocos, cun arco e tres pináculos piramidais (elementos residuais do barroco, a pesar de pertencer ao último cuarto do século XIX).

O sistema construtivo baséase nos muros de carga de cachotaría, utilizándose pezas de fábrica de cantaría para definir as esquinas e para enmarcar os ocos de portas e xanelas.

A cuberta é a dúas augas con estrutura de cimbras de madeira e tella do país.

Ao seu carón atópase situado o cemiterio vello.