Concello
Cincuenta rapaces iniciaron hoxe a actividade da primeira quenda dos campamentos de verán de Caión
03/07/2017
A primeira quenda dos campamentos de verán que, como cada ano, organiza o Concello da Laracha, estase a desenvolver desde o luns e rematará o venres, sendo a praia de Caión o escenario da maioría das actividades que se están a levar cabo cos cincuenta nenos participantes, todos eles de idades comprendidas entre os oito e os once anos.
Cada día o autobús cos rapaces e os monitores sae da praza do Concello ás 10:00 horas e regresa 18:00. A parada para o xantar nas instalacións das antigas escolas da Ínsua de Caión é ás 14:00. Durante toda a semana os participantes realizan moi diversas actividades lúdicas, recreativas, culturais e deportivas.
Nesta primeira xornada houbo un cursillo de iniciación ao surf e un obradoiro medioambiental. Os rapaces recibiron na propia praia a visita do alcalde, José Manuel López Varela, e da concelleira Patricia Bello.
Mañá realizarase unha saída ao parque acuático de Cerceda. O mércores contarase coa colaboración do Club SAL na organización e desenvolvemento dos obradoiros de salvamento e socorrismo. O xoves haberá unha xornada multiaventura en Padrón. O venres, visita ao museo etnolúdico de Ponteceso e, pola tarde, unha ruta de sendeirismo pola costa de Caión.
O Concello da Laracha asume os custos do transporte, do xantar e de todas as actividades que se realizan no termo municipal da Laracha.
A segunda quenda dos campamentos de verán de Caión, dirixida a mozos de entre doce e quince anos de idade, comezará a desenvolverse o luns da próxima semana. O prazo de inscrición permanece aberto.
Todos os anos o Concello da Laracha aposta por celebrar estes campamentos no marco do programa cultural e deportivo de verán aproveitando as instalacións municipais existentes en Caión e as características da vila, que permiten organizar un amplo abano de actividades nesta época do ano. Ademais de ofrecer ao nenos a posibilidade de divertirse practicando deporte e realizando actividades de tipo educativo, os campamentos son tamén unha importante axuda para a conciliación da vida persoal, laboral e familiar dos seus pais durante as vacacións nos centros educativos.
